काठमाडौ– अन्तर्राष्ट्रिय क्रिकेटमा घरेलु टोली अस्ट्रेलियाले दक्षिण अफ्रिकालाई २ सय ७६ रनले हराएको छ ।
यो दक्षिण अफ्रिकाले एकदिवसीय क्रिकेटमा अहिलेसम्मकै ठूलो हार बेहोरेको हो । यसअघि सन् २०२३ मा दक्षिण अफ्रिकाले घरेलु टोली भारतसँग कोलकातामा २ सय ४३ रनको हार बेहोरेको थियो ।
यस्तै अस्ट्रेलियाको यो दोस्रो सबैभन्दा ठूलो एकदिवसीय जीत हो । यसअघि सन् २०२३ मा दिल्लीमा अस्ट्रेलियाले नेदरल्यान्ड्सलाई ३ सय ९ रनले हराएको थियो ।
अस्ट्रेलियाले दिएको ४ सय ३२ रनको लक्ष्य पछ्याएको दक्षिण अफ्रिकाले २४ ओभर ५ बलमा १ सय ५५ रन बनाउँदा सबै विकेट गुमायो । दक्षिण अफ्रिकाका डेवाल्ड ब्रेभिसले सबैभन्दा धेरै ४९ रन बनाए । अस्ट्रेलियाका कूपर कोनोलीले ६ ओभरमा २२ रन दिएर ५ विकेट लिए ।
योसँगै कूपर एकदिवसीयमा ५ विकेट लिने सबैभन्दा कान्छो अस्ट्रेलियाली बनेका छन् । यस्तै यो एकदिवसीयमा अस्ट्रेलियाली स्पिनरको अहिलेसम्मकै उत्कृष्ट प्रदर्शन हो ।
यसअघि म्याकायमा टस जितेर ब्याटिङ गरेको अस्ट्रेलियाले ५० ओभरमा मात्र २ विकेट गुमाएर ४ सय ३१ रन बनायो ।
यो अस्ट्रेलियाले एकदिवसीय क्रिकेटमा बनाएको दोस्रो सबैभन्दा धेरै रन पनि हो । यसअघि अस्ट्रेलियाले सन् २००६ मा जोहानसबर्गमा दक्षिण अफ्रिकासँगकै खेलमा ४ सय ३४ रन बनाएको थियो ।अस्ट्रेलियाका ट्राभिस हेड, कप्तान मिचेल मार्श र क्यामरन ग्रीनले शतक तथा एलेक्स केरीले अर्धशतक बनाए । दक्षिण अफ्रिकाका केशव महाराज र सेनुरन मुथुस्वामीले १र१ विकेट लिए ।
तीन खेलको एकदिवसीय शृङ्खला यसअघि नै दक्षिण अफ्रिकाले जितिसकेको छ । दक्षिण अफ्रिका पहिलो खेलमा ९८ र दोस्रो खेलमा ८४ रनले विजयी भएको थियो ।
